261 №-Lİ MƏKTƏB-LİSEY

Aprelin 23-də məktəb-liseyin 8d sinfinde təsviri incəsənət fənni üzrə təcrübəçi tələbə Xoşqədəm Allahverdiyevanın "Xalçaçılıq" mövzusunda dərsi dinlənilib. Dərsdə məktəb-liseyin direktoru Könül Məmmədli, təlim-tərbiyə işləri üzrə direktor müavini Samirə Məhərrəmova, fənn müəllimi Zərəfşan Məmmədova, Azərbaycan Dövlət Pedaqoji Universitetinin baş metodisti Çingiz Rüstəmov və məktəb-liseydə pedaqoji təcrübə keçən tələbələr iştirak ediblər. Dərs qruplar üzrə iş formasında təşkil olunub. Dərs müddətində xalçaların cəmiyyətdə estetik rolu, Azərbaycan xalçalarının tarixi və xüsusiyyətləri, hər bölgəyə uyğun xalça naxışlarının olması, xalçaların işlənmə texnikasına görə növləri vurğulanıb. Daha sonra dərsin müzakirəsi təşkil olunub, pedaqoji təcrübə keçən müəllimlərə metodiki tövsiyələr verilib.

Aprelin 23-də məktəb-liseyin texnologiya müəllimi Zeynəb Ağayevanın təşkilatçılığı ilə 7 a sinif şagirdləri ilə 23 aprel -Ümumdünya Kitab və Müəllifik Hüququ Gününə həsr olunmuş dəyirmi masa keçirilib. Tədbiri giriş sözü ilə Z.Ağayeva açaraq bildirib ki , hər il ənənəvi olaraq ölkəmizdə YUNESKO-nun elan etdiyi 23 aprel –Ümumdünya Kitab və Müəlliflik Hüququ Günü qeyd olunur. Azərbaycanda bu əlamətdar tarix 1997-ci ildən başlayaraq hər il qeyd edilir. Oxumaqla və Ümumdünya Kitab və Müəlliflik Hüququ Gününü qeyd etməklə, məsafəyə baxmadan başqalarına açıq ola bilərik və təxəyyül sayəsində səyahətə çıxa bilərik. Kitabxanaçılar Narın Məmmədova və Rəvanə Dadaşova, Uşaq Birliyi Təşkilatı Rəhbəri İlhamə Mahmudova çıxış edərək kitabın şagirdlərin intelektual inkişafında, nitq mədəniyyətinin formalaşmasında, onların təxəyyülünün genişləndirilməsindəki rolundan danışıblar. Sonda şagirdlər kitabxanaya yeni gələn kitablarla maraqlanıb , mütaliə üçün götürüblər.

Aprelin 23-də məktəb- liseydə “Gəlin birlikdə oxuyaq!” devizi altında 45 dəqiqəlik “Mütaliə saatı” keçirilib. Məktəb-liseydə kitaba maraq, mütaliəyə həvəs göstərən müəllimli-şagirdli hər kəs məktəbin həyətində müxtəlif guşələrə çəkilərək mütaliə etdiyi kitabı oxuyub. Oxunan ədəbiyyat, mövzular, kitabların həcmi, janrı fərqli olsa da, hər kəs birləşdirən kitaba sevgi, oxumaq istəyi idi. Mütaliə ruhun qidasıdır. Gəlin oxuyaq! Hər zaman oxuyaq!

Aprelin 22-də məktəb-liseyin direktoru Könül Məmmədli məktəb-liseydə təsviri incəsənət fənni üzrə pedaqoji təcrübə keçən tələbələrə təlim keçib. Təlimin keçirilməsində məqsəd tələbələrə metodiki dəstəyin göstərilməsidir. Təlimdə müasir dərsə verilən tələblər, öyrətmə və qiymətləndirmə, sağlam psixoloji mühit, məktəbdə dəstəkləyici mühitin yaradılması məsələləri müzakirə edilib. Könül Məmmədli qeyd edib ki, dərsin təşkili zamanı şagirdlərin bilik və bacarıqlarının səviyyəsi, dərslərdəki irəliləyişləri, öyrənmə bacarıqları, davranışları və ətrafdakılarla qarşılıqlı münasibəti, öyrətmənin keyfiyyəti və formativ qiymətləndirmə əsas diqqət yetirilməli məsələlərdir.

Aprelin 17-də məktəb- liseydə təsviri incəsənət müəllimi Zərəfşan Məmmədova və məktəb-liseydə pedaqoji təcrübə keçən tələbələrin təşkilatçılığı ilə "Yaşıl dünya naminə həmrəylik ili" çərçivəsində rəsm sərgisi keçirilib. Sərgidə rəssamlığın müxtəlif texnikalarında və janrlarında işlənmiş gözəl rəsm əsərləri sərgilənib.Tədbirdə çıxış edən məktəb-liseyin direktoru Könül Məmmədli qeyd edib ki, Prezident İlham Əliyevin müvafiq Sərəncamı ilə 2024-cü ilin “Yaşıl dünya naminə həmrəylik ili” elan edilməsi təkcə ölkəmiz üçün deyil, bütün dünya üçün qlobal çağırışdır. O, bu çağırış naminə həmrəylik nümayiş edən hər kəsə təşəkkürünü bildirib. Şagirdlər öz işlərini təqdim ediblər. Sonda sərgidə iştirak edən şagirdlərə təşəkkürnamə təqdim olunub.